0711_san Benito, abata

Uztailaren 11n

San Benito, abata

Europako Zaindaria

Jaia

I. Irakurgaia

Egin kasu jakituriari.

Esaera Zaharrak liburutik

Es 2, 1-9

Ene seme, nire esanak onartu
eta nire aginduak gogoan gordetzen badozuz,
jakituriari kasu
eta zuhurtasunari jaramon egiten badeutsezu;
adimenari dei
eta zuhurtasunari oihu egiten badeutsezu,
horreek dirua eta altxorrak lez bilatzen badozuz,
orduan ulertuko dozu Jaunaganako begirunea,
eta Jainkoa ezagutzera helduko zara.
Jauna da-eta jakituria emoten dauana,
beragandik datoz ezaguera eta zuhurtasuna.
Berak emoten deutse arrakasta zintzoei
eta babesa jokabide zuzenekoei;
zuzenbidea babesten dau
eta zintzoen jokabidea zaintzen.
Orduan ulertuko dozu
zer dan justizia eta zuzenbidea,
jatortasuna eta jokabide on guztia.

Jaunak esana.

 

Erantzun-salmoa

Sal 34 [33], 2-3. 4-5. 6-7. 8-9. 10-11 ( R/. 2a edo 9a)

R/. Bedeinkatuko dot aldi oro Jauna.

Edo: Dastatu egizue eta ikusi zein ona dan Jauna.

V/.   Bedeinkatuko dot aldi oro Jauna,
        nire ahoan beti haren gorespena.
        Harro nago Jaunagaz,
        entzun begie apalek eta poztu beitez. R/.

V/.   Handietsi nigaz batera Jauna,
        goratu dagigun alkarregaz haren izena.
        Jaunagana jo neban, eta harek erantzun,
        bildur guztietatik ninduan libratu. R/.

V/.   Begiratzen deutsoenak distiratsu egongo dira,
        ez jake aurpegia lotsaz gorrituko.
        Dohakabeak dei egin eban, eta Jaunak entzun,
        eta estualdi guztietatik eban salbatu. R/.

V/.   Kanpaturik dago Jaunaren aingerua
        hari begirune deutsoenen inguruan,
        eta libratzen ditu.
        Dastatu egizue eta ikusi zein ona dan Jauna;
        zorionekoa harengan babesten dana. R/.

V/.   Izan Jaunari begirune zuek, hari sagaratuok,
        ez jake-eta ezer falta begirune deutsoenei.
        Aberatsek ezagutzen dabe beharrizana eta gosea;
        Jaunagana jotzen dabenei ez jake onik falta. R/.

 

Aleluia

Mt 5, 3

R/. Aleluia.

V/.   Zorionekoak gogoz behartsu diranak,
        eurena dabe-eta Jainkoaren erreinua. R/.

 

Ebanjelioa

Zuek, nire jarraitzaileok, ehun halako hartuko dozue.

✠ Jesu Kristoren Ebanjelioa San Mateoren liburutik

Mt 19, 27-29

    Aldi haretan, Pedrok esan eutson Jesusi: «Hara, guk dana itzi dogu, Zuri jarraitzeko. Zer izango da guretzat?»
    Jesusek erantzun eutsen: «Benetan dinotsuet: Jainkoak mundu hau erabarritzean eta Gizonaren Semea bere aintzazko tronuan jesartzean, zuek be, nire jarraitzaileok, hamabi tronutan jesarriko zarie, Israelgo hamabi leinuak epaitzeko. Eta Nigaitik etxea, senideak, aita, ama, semealabak edota lurrak izten dituanak, ehun halako hartuko dau eta betiko bizitza jasoko ondare.

Jaunak esana.